KAN MI FERM LO ZYE
Tourn kom ou vé, partou na la mér
Mon péi in galé, in morso la tér
La pa pou sapé, rouv lo zyé ta war
Akoté la minm, lorizon lé gayar.
Mars kom ou vé, la sab lé so
Do lo do sèl la kay an gob
Dési la plaz, ban'n koray
I dékonpoz
Parèy ban'n tèt faraon
Dan'n dézér Lézip.
Karo filao i pérd sové dan'n Lérmitaz
Fami pinpin i nouri zandèt
Dan'n Sin Filip
Ou pé fé lo tour, la pwin dé plas
Lé parèy.
Kan la mér i bat, na kom in souf
Dan mon zorèy
Kan la tér i sif, lo san volkan
Lé an salér
Kan mi férm lo zyé, mi rosan
Léspri lo kér la tér
***
BABA NIYAZ
Niyaz avèk brouyar
I désan’n si la montay
Zot i koul an vwal blan
Otour kaskad Sodron.
Pik Adan la disparèt
La tourn an ki’d ta bwèt
Ziska piton Bwa’d Nèf
I dor dan’n in pay koton.
Lér lé fré lé dou
Lo’p ti van lé glasé
La rozé la mouy partou
Pangar pou pa glisé.
Par an ba la mér lé nwar
I fé pér ziska
Li apa lwin arzwin’n brouyar
Pou fé nèt in’n ti baba
In’n ti marmay do lo
In farinn pou nou aswar.
1 commentaire:
Fonnkèr la i koul , i désann dann gozyé koman la shèr létshi byin tann.
mèrsi byin Karl Bègue!
Mèt ankor la pa asé!
Enregistrer un commentaire